Eins og flestum Vestfirðingum ætti að vera kunnugt þá hafa öll sveitarfélög á Vestfjörðum ákveðið að standa sameiginlega að því að komið verði á umhverfisvottun Vestfjarða samkvæmt staðli EarthCheck. Á síðasta ári héldu Ferðamálasamtök Vestfjarða heljarmikla ráðstefnu þar sem vakin var athygli á umhverfisvottun svæðisins í heild. Nú er komið að Vesturlandi en fimmtudaginn 22. september næstkomandi standa Framkvæmdaráð Snæfellsness, Náttúrustofa Vesturlands og Borgarbyggð fyrir ráðstefnu um umhverfismál og umhverfisvottanir.
Starfsemi sveitarfélaganna á Snæfellsnesi er umhverfisvottuð samkvæmt staðli EarthCheck vottunarsamtakanna. Í fyrrahaust var samþykkt ályktun á aðalfundi Samtaka sveitarfélaga á Vesturlandi um að skoða umhverfisvottun fyrir Vesturland allt með Snæfellsnes sem fyrirmynd. Tilgangur ráðstefnunnar er að fjalla um stöðu umhverfismála og kynna þessa hugmynd.
Bent verður á mikilvægi umhverfisverndar og hvað hægt sé að gera til þess að sporna gegn þeirri neikvæðu þróun sem átt hefur sér stað síðustu áratugi.
Aðgangur er ókeypis og allir velkomnir!

Hægt er að skoða glæsilega dagskrá fundarins á slóðinni http://vestfirskferdamal.is/skraarsafn/skra/68/
Áhugasamir eru vinsamlegast beðnir um að skrá sig á netfangið theo@nsv.is

Framundan er uppskeruhátíð vestfirskrar ferðaþjónustu en stefnt er að því að ferðaþjónustaðilar og starfsfólk þeirra geri sér glaðan dag á Hótel Núpi í Dýrafirði laugardaginn 15. október n.k. Stefnt er að því að þetta verði árlegur viðburður og færist á milli staða frá ári til árs. Hugmynd að uppskeruhátíðinni á rætur sínar að rekja til stefnumótunarvinnunnar sem lögð var fram á síðasta ári en í henni er gert ráð fyrir að hausthátíðin verði haldin í fyrsta sinn haustið 2011. Verkefnið er sameiginlegt verkefni Ferðamálasamtaka Vestfjarða og Markaðsstofu Vestfjarða. Verið er að vinna að dagskrá sem verður kynnt í næstu viku. Það er allavega óhætt að fara að taka daginn frá og hefja undirbúning til að hitta kollega sína´frá öllum fjörðum og víkum fjórðungsins í góðu fjöri um miðjan október.

Nú fara ferðamenn brátt að streyma á Vestfirði og Dali eins og enginn sé morgundagurinn og því er tímabært að verða sér úti um lager á göngukortunum góðu sem ná yfir alla Vestfirði og Dali. Þetta eru sjö mismunandi kort sem hafa verið mjög vinsæl meðal ferðamanna. Kortið kostar 600 kr frá Ferðamálasamtökunum og algengt útsöluverð á þeim 1000-1500 kr.

Vonandi verða sem flestir á Vestfjörðum og í Dölum með kortin til sölu hjá sér í sumar. Kortin er hægt að kaupa á sölusíðu Ferðamálasamtaka Vestfjarða og hana er hægt að nálgast með því að smella hér eða í gegnum þessa heimasíðu FMSV með því að smella á efri myndina hér á vinstri hönd. Sölusíða Ferðamálasamtakanna er eingöngu ætluð endursöluaðilum göngukortanna. Lágmarksfjöldi kortanna í hverri pöntun eru 10 kort.

Spurningar og svör um pantanir í gegnum netið sem er að finna á sölusíðu samtakanna.

Námskeiðið Færni í ferðaþjónustu fer fram í maí. Að þessu sinni verða í boði tvö námskeið. Þetta er í annað sinn sem fyrra námskeiðið verður haldið en góð þátttaka var á því á síðasta ári. Þetta er gott nám fyrir fólk sem starfar í ferðaþjónustu.

Ferðamálasamtök Vestfjarða vilja hvetja vestfirska ferðaþjónustuaðila til að senda starfsfólk sitt á námskeiðið.

Færni í ferðaþjónustu I - Hefst 2. maí
Færni í ferðaþjónustu I er 60 kennslustunda nám samkvæmt námskrá frá Fræðslumiðstöð atvinnulífsins og haldið í samstarfi við Ferðamálasamtök Vestfjarða. Námið er ætlað starfsmönnum í ferðaþjónustu eða þeim sem stefna að starfi í greininni.
Tími: Kennt á Ísafirði virka daga kl. 9:00-12:00 og 13:00-16:00. Hefst 2. maí og lýkur 10. maí.
Kennarar: Sigurður Arnfjörð ásamt gestakennurum.
Verð: 10.000 kr. (60 kennslustundir).
 
Færni í ferðaþjónustu II - Hefst 11. maí
Haldið í samstarfi við Ferðamálasamtök Vestfjarða. Sjálfstætt framhald af Færni í ferðaþjónustu I. Námið er 100 kennslustundir og kennt samkvæmt námskrá frá Fræðslumiðstöð atvinnulífsins. Námið er ætlað starfsmönnum í ferðaþjónustu eða þeim sem stefna að starfi í greininni.
Tími: Kennt á Ísafirði virka daga kl. 9:00-12:00 og 13:00-16:00. Hefst 11. maí og lýkur 27. maí.
Kennarar: Ýmsir.
Verð: 17.000 kr. (100 kennslustundir).
 
Skráningar hjá Fræðslumiðstöð Vestfjarða á http://www.frmst.is/ undir Námskeið, í síma 456 5025, eða með tölvupósti frmst@frmst.is

Framhaldsaðalfundur Ferðamálasamtaka Vestfjarða verður haldinn fimmtudaginn 28. apríl kl. 13:00 í Melrakkasetrinu í Súðaví.
 
Fundarefni.
 
1. Lagabreytingar
            Stjórn Ferðamálasamtaka Vestfjarða leggur fram eftirfarandi lagabreytingartillögu:

Bætt verði við eftirfarandi grein í lög samtakanna og verði hún 9. gr.

• a) Við úrsögn úr Ferðamálasamtökum Vestfjarða missir félagi allan rétt til samtakanna. Félagar í Ferðamálasamtökum Vestfjarða eiga ekki tilkall til eigna eða muna samtakanna. Sama gildir um eignarhluta samtakanna í öðrum félögum s.s. einkahlutafélögum.
• b) 9. grein núverandi laga verði að 10. grein.

2. Kosning í stjórn Vesturferða

3. Önnur mál

Núverandi lagasafn sem samþykkt var á aðalfundi í Bolungarvík árið 2006 er að finna á slóðinni http://www.vestfirskferdamal.is/fsamtokin/