Fer�am�lasamt�k Vestfjar�a - Allar fr�ttir

Sk�rsla formanns � a�alfundi FMSV � H�tel Bjarkarlundi 14. apr�l 2012

Wed, 16 May 2012 10:02:00 +0000

Fundarstjóri, kæru vinir og félagar

Ég vil bjóða ykkur velkomin á enn einn aðalfund Ferðamálasamtaka Vestfjarða, sem munu eftir þennan fund hefja sitt 28. starfsár. Það hefur margt vatn runnið til sjávar á þeim tíma og umhverfi ferðaþjónustunnar á Vestfjörðum tekið miklum stakkaskiptum.

Ég man sjálfur svo vel eftir því sumarið 1984 hvað manni þótti spennandi að sjá útlendinga með bakpoka ganga um stræti Hólmavíkur. Það var oftast um að ræða puttalinga og svo birtist einn og einn bílaleigubíll, forverar Yaris fólksins svokallað sem við þekkjum svo vel í dag. Þjónusta fyrir ferðamenn var ekki mikil, þó gekk rúta þangað á Strandir tvisvar eða þrisvar í viku og gott ef ekki alla leið norður í Árneshrepp í einni ferðinni, en það er nú aflagt þrátt fyrir stóraukinn ferðamannastraum og er nú önnur saga sem ég kann ekki skil á.

Frú Vigdís Finnbogadóttir var forseti lýðveldisins og hvatti landsmenn óspart til að planta trjám. Það urðu margir til að hlýða á hana og hófu trjárækt í görðum sínum sem síðan hafa vaxið og dafnað frá því að vera litlar viðkvæmar plöntur upp í stærri og myndarleg tré með gilda stofna hjá þeim sem höfðu eljuna og þolinmæðina til að bera. Það gat verið basl hjá mörgum garðræktandanum að koma trjánum sínum til en hjá öðrum gekk það betur. Það er nefnilega allt spurning um elju hvers og eins, þolinmæði og ekki síður hvort umhverfi gróðursins sé honum hagstæður. Þeir hafa oftar náð bestum árangri sem hafa farið nokkuð skipulega að trjáræktinni, haft þolinmæði til að bera og velt fyrir sér árstíðum og fleiri þáttum, eða leitað sér upplýsinga um hvernig best sé að haga sér í ræktinni.

Sama á við um ferðaþjónustu á Vestfjörðum. Hún er orðin mikilsverð atvinnugrein sem hefur vaxið úr því að vera viðkvæmur sproti upp í það að skapa skjól fyrir fjölda fólks, og sáð í leiðinni áburði í samfélögin sem hún starfar í.

Við eigum því fólki sem stóð fyrir því að mynda þetta samstarfsumhverfi sem Ferðamálasamtökin standa fyrir fyrir 28 árum nokkuð að þakka. Það er svo mikilvægt fyrir okkur sem störfum í greininni að hafa vettvang til að koma saman, kynnast hvort öðru, læra af hvort öðru og skiptast á skoðunum. Þegar öllu er á botninn hvolft þá erum við öll á leið að sama marki og það er þægilegra fyrir okkur að arka þangað saman í hóp og í góðu skjóli frekar en ein á berangri.

Þau verkefni sem Ferðamálasamtökin hafa staðið fyrir í gegnum tíðina hafa undantekningalaust miðast að því að vinna að sameiginlegum hagsmunum þeirra sem starfa í greininni allt í kringum kjálkann. Það hafa margar misjafnar leiðir verið farnar, enda margar leiðir til Parísar eins og einn góður vinur minn tönglast gjarnan á. Leiðin er þó heldur greinilegri og þar með líklega fljótlegri ef hún hefur verið kortlögð, sem er einmitt það sem samtökin unnu svo vel að, fyrir tveimur árum með stefnumótun vestfirskrar ferðaþjónustu 2010 – 2015. Í henni koma fram leiðir sem hægt er að feta sig áfram til að vinna að framgangi greinarinnar á næstu árum. Sumt er einfalt að gera og annað tekur heldur meiri tíma og þolinmæði.

Á síðasta ári var mest vinna lögð í samstarfi ferðaþjónustunnar í markaðssetningu og vöruþróun með því að hvetja til kaupa í ferðaskrifstofunni Vesturferðir og freista þess að búa til grundvöll fyrir alla ferðaþjónustuaðila á Vestfjörðum að koma vöru sinni og þjónustu á framfæri. Yfir 50 aðilar ákváðu að taka þátt í verkefninu og það verður spennandi að sjá hvaða ávöxt það samstarf muni bera á næstu árum. Ég er sannfærður um það að með góðri samvinnu og vilja til að vinna saman þá verði hægt auka mjög vöxt greinarinnar á komandi misserum. Með því að hlúa sameiginlega að hvort öðru og hjálpast við að bera áburð í svörðinn.

Þar getur orðið til það skjólbelti sem þarf til að plöntur af öðrum meiði geti þrifist. Skjólbelti til að búa til þá sjálfbærni sem greinin þarf svo mjög á að halda.

Í könnunum sem gerðar hafa verið kemur fram að það sem þykir einkenna Vestfirði séu einstök, hrein og óspillt náttúra og nálægðin við hana. Kyrrðin og friðsældin. Þetta er sumsé hluti af okkar auði, okkar sparigrís sem við þurfum að fara svo gætilega með.

Umhverfisvottun Vestfjarða hefur nú verið samþykkt af öllum sveitarfélögum og er verkefni sem þau hafa ákveðið að stefna sameiginlega að undir formerkjum Fjórðungssambands Vestfirðinga. Ég veit ekki nákvæmlega hvar það verkefni stendur eins og er, en veit þó að lagt hefur verið eitthvað fjármagn í það af hinu opinbera. Ég geri ráð fyrir að þar sé allt í einhverjum ákveðnum farvegi, því vilji er allt sem til þarf. Bara sú sameiginlega yfirlýsing sem Fjórðungssambandið gaf út með ákvörðun sinni hafði strax veruleg og góð áhrif í ferðaþjónustunni. Dæmi eru um að með henni þá hafi einstakir fjárfestar strax séð tækifæri og ákveðið að fjárfesta í greininni á svæðinu. Þetta verkefni sem var ýtt úr vör af Ferðamálasamtökum Vestfjarða er dæmi um fyrirmyndarverkefni sem við getum öll verið stolt af.

Uppskeruhátíð ferðaþjónustunnar var haldin í fyrsta sinn á haustdögum. Hún tókst vel til og ég tel það mikilvægt að festa hana enn betur í sessi. Dýrfirðingar tóku á móti okkur með glæsibrag og við áttum saman tvo góða daga á þeim fagra stað. Það eina sem skyggði á var færðin en það vildi svo illa til að fyrsti vetrarstormur haustsins gekk yfir þessa helgi á Hrafnseyrarheiðinni og komust því færri en vildu. En við þurfum bara að læra af því og færa þessa gleðihelgi okkar framar á dagatalið. Bolvíkingar hafa boðist til að halda næstu uppskeruhátíð og við getum byrjað að hlakka til að hittast aftur næsta haust.

Nokkur umræða var í vetur um breytingu á öllu stoðkerfinu. Það var erfið umræða sem satt að segja tók frá mér nokkra orku. Stjórn ferðamálasamtakanna stóð þétt saman um að verja aðkomu greinarinnar að ákvörðunum. Það er skemmst frá því að segja að við urðum undir í þeim viðræðum. Mér þótti það sárt og upplifði mig satt að segja sem auman talsmann samtakanna í öllu því samtali. Á þessari stundu er ekki alveg á tæru hvernig samstarf ferðaþjónustunnar við sveitarfélögin verður háttað þegar kemur að Markaðsstofunni. Það er skýr og fullur vilji hjá núverandi stjórn Ferðamálasamtakanna og AtVest að vinna að því að stofnanirnar starfi betur saman og sjá til þess að grasrótin hafi aðkomu að ákvörðunum. Það er þó ekki þannig að ég sjái það endilega sem einhverja ógn þó talsvert hafi borið á milli í skoðunum okkar og fulltrúa sveitarfélaganna. Ég trúi því einfaldlega að skynsemin verði ofan á og það muni að lokum allir sjá það, að í verkefnum sem viðkoma einstökum atvinnugreinum þurfa þær sjálfar að hafa aðkomu að ákvörðunum.

Það eru framundan nokkrar jákvæðar breytingar á úthlutun fjár til landshlutasamtaka líkt og okkar frá Ferðamálastofu. Undanfarin ár hafa fjármunir sem eru eyrnarmerktir þeim verið lagðar til Ferðamálasamtaka Íslands ásamt drjúgum sjóði til rekstur þeirra. Sú breyting verður á kerfinu að Ferðamálastofa mun framvegis hafa beint og nánara samband við landshlutasamtökin. Einnig verður stofnaður sérstakur sjóður sem landshlutasamtök geta sótt í fyrir verkefni sín. Við stöndum vel að vígi í því nýja kerfi vegna þeirrar vinnu sem við höfum lagt í undanfarin ár með stefnumótun vestfirskrar ferðaþjónustu. Sameiginleg verkefni sem koma fram þar munu falla vel inn í þann ramma og mun gera okkur kleyft að fjármagna alla þá vinnu sem framundan er. Þetta eru tillögur sem koma beint frá ferðamálastjóra og ég tel að við ættum að styðja heilshugar.

Ég hafði ákveðið að gefa ekki kost á mér til formennsku samtakanna fyrir þennan aðalfund og sent út tilkynningu þess efnis. Ég hef nú starfað í stjórn þeirra í fimm ár samfleytt og þar af verið formaður í þrjú. Þegar ég lít yfir farinn veg þá er ég fyrst og fremst þakklátur fyrir að hafa verið treyst fyrir þessu starfi og ég lít til baka nokkuð stoltur um öxl. Mér hefur þó fundist sem eldmóðurinn hafi verið að dofna og því réttur tími núna til að annar formaður taki við. Ég verð að viðurkenna að vinnan í vetur sem kom að stoðkerfinu hafði talsvert um það að segja að ég vildi draga mig í hlé. Eftir að við komum saman hér í Bjarkarlundi í gærkvöldi þá fann ég fyrir þeim mikla þrýstingi frá meðlimum samtakanna að ég gæfi kost á mér í eitt ár til viðbótar. Ég er semsagt tilbúinn til þess þar sem ég hef fundið fyrir því að ég hef mikinn stuðning ykkar til áframhaldandi verka. Ég vil trúa því að Ferðamálasamtök Vestfjarða muni standa enn sterkari sem hagsmunasamtök vestfirskrar ferðaþjónustu á eftir. Verkefni okkar verða eftir sem áður að verja sjálfstæði Markaðsstofunnar og sjá til þess að rödd okkar heyrist þar inni. Ferðamálasamtökin eru verkfæri okkar allra til að koma skilaboðum okkar á framfæri og standa vörð um greinina um allan fjórðunginn. Þau eiga að hafa það traust að það sé hægt að leita til þeirra af ferðaþjónustuaðilum og koma málefnum þeirra á framfæri.

Það er nokkuð mikið og að mörgu leyti öfundsvert starf að vera formaður samtakanna. Góðir kostir í því er að kunna þá kúnst að horfa á Vestfirði sem eina heild, hafa óbilandi trú á greininni, gleði af því að vinna með öðru fólki og ekki síst skilning á því að atvinnugreinin sjálf verður að vera þátttakandi í ákvörðunum sem varða vöxt hennar. Ekki er verra að hafa smá bein í nefinu, hugsjónir og trú á sjálfri sér eða sjálfum, reyna að tileinka sér víðsýni á öllum hlutum greinarinnar og síðast en ekki síst, að hafa áhuga til þess að vinna að framgangi greinarinnar af öllum þeim mætti sem skapaður er í einni lítilfjörlegri persónu.

Framundan hjá okkur er að vinna áfram sem hluti af grasrót ferðaþjónustunnar og stuðla að því að verkefni sem komin eru í gang dafni enn frekar innan þeirra mörgu háu trjáa sem vaxið hafa undanfarin ár og myndað það mikilvæga skjólbelti fyrir greinina sem henni er nauðsynlegt.

Skjólbelti samvinnu, trausts og vilja til að hlúa að öðrum.

- Fram til sigurs!

Sigurður Atlason

Fr�ttatilkynning fr� Hornstrandafri�landi

Tue, 17 Apr 2012 11:05:00 +0000

Það styttist óðfluga í sumarið með tilheyrandi ferðalögum og atgangi. Áætlanir hefjast í Hornstrandafriðlandið í júní n.k., en einhverjir ferðamenn eru á faraldsfæti nyrðra nú þegar og eitthvað um fyrirspurnir. Nær allan snjó tók upp af svæðinu í lok mars og var snjólaust á láglendi. Aftur snjóaði í lok Páska, en sá snjór er blautur og hverfur sennilega hratt aftur. Landið er því blautt og mjög viðkvæmt yfirferða. Samkvæmt reglum friðlandsins þurfa nú allir ferðamenn sem fara á svæðið að tilkynna um ferðir sínar. Hornstrandastofa á Ísafirði tekur við slíkum meldingum og er hægt að hafa samband símleiðis í síma 591 2000 (biðja skal um Hornstrandastofu) eða með tölvupósti, netfang hornstrandir@umhverfisstofnun.is Umrætt ákvæði nær þó ekki til landeigenda, en þeir mega að sjálfsögðu láta vita um ferðir sínar og fá þá meldingar ef eitthvað ber við á svæðinu s.s. ísbjarnarkomur og annað slíkt.

Meðfylgjandi eru leiðbeiningar um ferðalög í Hornstrandafriðlandið snemmsumars svo og auglýstar reglur svæðisins.

Liðna helgi fóru fjölmargir ferðamenn á vélsleðum um friðlandið. Samkvæmt reglum friðlandsins er allur akstur vélknúinna ökutækja óheimill í friðlandinu án heimildar Umhverfisstofnunar. Þetta ákvæði á einnig við um vélsleða. Benda má vélsleðamönnum sem leita til ykkar með upplýsingar um snjóalög og annað slíkt á þetta ákvæði. Hinsvegar geta þeir leitað heimildar Umhverfisstofnunar samkvæmt sömu reglum.

Þessi póstur er sendur á þá sem stunda ferðaþjónustu á norðanverðum Vestfjörðum, veita upplýsingar til ferðamanna eða eru tengdir á annan hátt. Ef viðkomandi vill nú ekki fá slíka sendingu, endilega látið vita með tölvupósti. Einnig ef einhverjir sem ekki fá þennan póst vilja vera með á póstlista.

Bestu kveðjur, Best regards
Jón Björnsson
Sérfræðingur, Nature reserve officer
Svið náttúruauðlinda, Department for natural resources

Reykh�lahreppur er me�'etta

Sun, 15 Apr 2012 20:59:00 +0000

Kveðja til íbúa Reykhólasveitar

Það var einkar vel tekið á móti okkur ferðaþjónustuaðilum á Vestfjörðum sem fjölmenntum í Reykhólasveit um helgina á aðalfundarhelgina okkar. Gestrisnin var til fyrirmyndar og gleðin og fjörið sem heimamenn skópu mun seint eða aldrei renna úr minni nokkurs manns sem þangað mætti. Sveitin skartaði sínu fegursta og gestgjafar okkar tóku sérlega vel á móti okkur. Það var gaman að sjá og heyra af þeim áformum sem eru í gangi í ferðaþjónustunni í sveitinni og finna fyrir þeim krafti og orku sem við finnum að hefur verið að leysast úr læðingi í Reykhólahreppi. Ég er sannfærður um það eftir dvöl okkar að það er gott samfélag í sveitinni, þar sem yngri kynslóðin er hvött áfram og þau fá að finna það að framlag þeirra skiptir máli. Meðan þannig er getur eingöngu verið bjart framundan.

Ég vil fyrir hönd okkar allra sem sóttum aðalfundarhelgina koma sérstökum kveðjum til Hörpu Eiríksdóttur ferðamálafulltrúa Reykhólahrepps. Það eru engar ýkjur að við erum öll agndofa yfir þessum ótrúlega karakter og megi sem flestir smitast verulega af krafti hennar og gleði. Ef öll sveitarfélög á Vestfjörðum ættu slíkan starfsmann til að sinna málefnum ferðaþjónustunnar og býr í Hörpu þá væri lífið ekki bara skemmtilegra og þægilegra heldur væri nokkuð víst að nokkur árangur væri í sjónmáli. Það segi ég satt. Af fullri einlægni vil ég óska íbúum sveitarinnar hjartanlega til hamingju með að hafa svona starfsmann. Við getum öll öfundað ykkur af henni. Takk kærlega fyrir okkur Harpa.

Kolla, Oddur og allt starfsfólk Hótel Bjarkalundar fóru um okkur mjúkum höndum og við nutum innilegrar gestrisni þar í góðu atlæti. Matur og gisting eru fyrsta flokks og það er ánægjulegt að sjá hvaða alúð er lögð við alla uppbyggingu á og við hótelið. Ég vil fyrir hönd Ferðamállasamtaka Vestfjarða óska ykkur öllum velfarnaðar í þeirri vönduðu uppbyggingu sem þið standið í um þessar mundir. Þetta gamla sögufræga sveitahótel mun skína bjart á 65 ára afmæli þess sem er framundan í sumar. Innilegar þakkir fyrir okkur.

Kærar þakkir frá okkur færum við Sveini Ragnarssyni og Hlyni Þór Magnússyni fyrir að standa sig jafnvel og raun bar vitni við fundarstjórn og fundarritun. Það er gott að hafa aðgang að svo vönduðum mönnum sem þið eruð. Kærar þakkir fyrir okkur.

Það var gaman að fá fregnir af þeirri uppbyggingu sem er framundan hjá gistiheimilinu Álftalandi á Reykhólum þar sem stendur til að bæta við enn fleiri herbergjum. Að fá að heimsækja Sájvársmiðjuna í þorpinu og kynnast eins og kostur var þaraböðunum og öllum þeim áformum sem eru framundan þar. Svanhildur tók þar á móti okkur með þeim þokka sem einungis prýða sómafólk. Kærar þakkir fyrir okkur.

Það var ekki síður ánægjulegt að sjá hve vel hefur til tekist að spinna saman Hlunnindasýninguna og Bátasafnið. Það er vel gerð vinna og ber vitni um að þar er vandað til verka. Upplýsingamiðstöðin á sama stað gerir staðinn að þeirri þungamiðju sem nauðsynleg hverju þorpi sem vill láta taka sig alvarlega í ferðaþjónustu. Fregnir af frekari uppbyggingu á tjaldsvæðinu á Melanesi og því sem er framundan hjá Arnarsetrinu í Króksfjarðarnesi þar sem stendur til að opna litla kynningarsýningu um verkefnið í sumar á handverksmarkaði Össu eru enn önnur dæmi um þann dug og kraft sem finna má í Reykhólahreppi.

Heimsókn okkar til feðganna á Seljanesi á bíla- og dráttarvélasafnið er í einu orði sagt mögnuð upplifun. Maður verður orðlaus og agndofa yfir þeim dugnaði og áhuga sem skín þar í gegn af hverjum hlut á þeim magnaða stað. Fyrir utan hvað þeir feðgar eru óhemju skemmtilegir og gaman að hlýða á og vera með. Það var ekki síður upplifun að fá að smakka á kjötinu og bjúgunum frá Reykskemmunni á Stað sem hjónin Eiríkur og Fríða standa svo myndarlega að. Ég man ekki eftir því að reyktar landbúnaðarafurðir bráðni jafnvel í munni og það sem þau buðu upp á. Starfsemi þeirra er góður vitnisburður um hvernig hefðbundinn landbúnaður getur tónað vel við ferðaþjónustuna og áminning um hvað greinarnar styrkja hvor aðra.

Leikfélagi sveitarinnar og öllum þeim sem styttu okkur stundir og stóðu fyrir dagskránni á hátíðarkvöldinu þökkum við kærlega fyrir. Þið eruð einfaldlega óborganlega skemmtileg.

Reykhólasveit er dularfull veröld þar sem ævintýri eru að finna í hverju spori. Heimafólk hefur komið auga á svo ótal mörg tækifæri og það verður sérlega spennandi að fá að fylgjast með hvað Reykhólahreppur muni hafa upp á að bjóða í nánustu framtíð, fá að verða vitni að því hvernig ferðaþjónustan þar á eftir að springa út. Það er bjart framundan í Reykhólasveit. Við fórum öll heim til okkar með þá vissu.

Kæru íbúar og ferðaþjónustufólk í Reykhólahreppi. Bestu þakkir fyrir okkur. Þið eruð frábær.

Reykhólahreppur er með'etta.

Fyrir hönd Ferðamálasamtaka Vestfjarða
Sigurður Atlason
formaður

Dagskr� komandi a�alfundarhelgi

Tue, 10 Apr 2012 19:17:00 +0000

DAGSKRÁ

Aðalfundarhelgi Ferðamálasamtaka Vestfjarða

Hótel Bjarkalundi 13. – 15. apríl 2012

Pantanir í gistingu og mat á Hótel Bjarkalundi
S: 434-7863 eða 434-7762, helst fyrir fimmtugskvöld 12. apríl

Föstudagur 13. apríl
Mæting og skráning kl. 18:00 – 19:00
Kl. 19:00 – 20:00 - Léttur kvöldverður.
Kl. 20:00 - Ferðaþjónusta í Reykhólasveit
Harpa Eiríksdóttir ferðamálafulltrúi Reykhólahrepps kynnir ferðamöguleika í Reykhólasveit. Samkrull vestfirskra ferðaþjónustuaðila á Vestfjörðum fram að háttatíma.

Laugardagur 14. apríl
Kl. 09:00 - Aðalfundur Ferðamálasamtaka Vestfjarða
Venjuleg aðalfundarstörf, ársreikningar, skýrsla stjórnar, stjórnarkjör og önnur mál.
Íslandskynning – Gústaf Gústafsson kynnir sameiginleg áform Markaðsstofa í landinu og Ferðamálastofu í innanlandsherferð næstu ára.

Kl. 12:00 – Hádegisverður
Kl. 13:00 – Aðalfundur Vesturferða
(Lokaður fundur hluthafa Vesturferða ehf - Gönguferð í nágrenni Bjarkalundar er í boði fyrir þá sem sitja ekki þann fund)
kl. 15:00 – Kaffi í boði FMSV
Kl. 15:30 – Óvissuferð um Reykhólasveit með heimamönnum
Kl. 20:00 – Hátíðarkvöldverður og kvöldvaka í framhaldinu.

Verð fyrir allan pakkann gistingu í tvær nætur fyrir pr. mann er kr. 16.000.-
Innifalið er gisting í tvær nætur með morgunverði á Hótel Bjarkalundi. Léttum hádegisverði og hátíðarkvöldverði á laugardag.
Súpa og brauð föstudagskvöld kr.1.000,-

Sjá dagskrá í pdf sniði
http://www.vestfirskferdamal.is/skraarsafn/skra/71/

A�alfundarbo� 2012 �ann 14. apr�l

Sat, 24 Mar 2012 12:09:00 +0000

Aðalfundur Ferðamálasamtaka Vestfjarða verður haldinn á Hótel Bjarkalundi í Reykhólasveit laugardaginn 14. apríl n.k. kl. 09:00.

Að venju verður mæting um kvöldmatarleytið á föstudagskvöldið og lítil dagskrá um ferðamál um kvöldið. Núverandi formaður mun ekki gefa áfram kost á sér til stjórnarsetu og því er ljóst að nýr formaður FMSV mun taka við á aðalfundinum. Kosið verður um fjóra stjórnarmenn til viðbótar á fundinum.

Nánari dagskrárupplýsingar verða sendar síðar en ferðaþjónustuaðilum er bent á að taka helgina frá.

Stjórn samtakanna skal kosin árlega á aðalfundi, sem halda skal fyrri hluta árs þannig að árlega eru kosnir þrír menn til tveggja ára , en í stjórn sitja sex menn auk formanns, sem kjósa skal sérstaklega á hverjum aðalfundi til árs í senn. Leitast skal við að kjósa fulltrúa sem flestra svæða í stjórn. Kjósa skal tvo skoðunarmenn reikninga og tvo til vara.

Lög FMSV
http://www.vestfirskferdamal.is/fsamtokin/

Greiðsluseðlar vegna árgjalda verða sendir út þriðjudaginn 3. apríl eða miðvikudaginn 4. apríl. Þeir sem greiða árgjald fyrir aðalfund teljast fullgildir félagar og öðlast atkvæðisrétt.

Með góðri kveðju,

Fyrir hönd stjórnar FMSV

Sigurður Atlason
formaður

N�mskei� � vegum Fr��slumi�st��var Vestfjar�a

Tue, 24 Jan 2012 11:16:00 +0000

Fyrirhuguð eru nokkur námskeið á vegum Fræðslumiðstöðvar Vestfjarða sem geta örugglega nýst ákveðnum aðilum ferðaþjónustunnar vel. Þau eru eftirfarandi:

Enska II, námskeið fyrir þá sem hafa einhvern grunn í ensku en ekki notað málið mikið. Hefst í dag, 24. janúar kl. 16:30.

Þýska II, námskeið fyrir þá sem hafa einhvern grunn í þýsku en ekki notað málið mikið. Hefst 1. febrúar kl. 18:00.

Norska fyrir byrjendur. Hefst 7. febrúar.

Tölvur ekkert mál – námskeið fyrir fólk sem hefur ekki mikla tölvukunnáttu. Hefst 26. janúar kl. 18:00.

Bókhald og skjalavarsla – upplagt námskeið fyrir fólk sem kemur að fyrirtækjarekstri. Hefst 31. janúar kl. 18:00.

Um miðjan febrúar er fyrirhugað að byrja með enskunámskeið fyrir lengra komna þar sem áhersla er á talmál.

Nánari upplýsingar um þessi og önnur námskeið sem og skráning er á vef Fræðslumiðstöðvarinnar www.frmst.is og í síma 456 5025.

Heydalur hlaut hvatningarver�laun Fer�a�j�nustu b�nda

Wed, 14 Dec 2011 12:43:00 +0000

Á uppskeruhátíð Ferðaþjónustu bænda sem haldin var þann 23. nóvember s.l. veitti skrifstofa Ferðaþjónustu bænda 6 bæjum innan samtakanna sérstakar viðurkenningar og var það í fyrsta sinn sem skrifstofan veitti verðlaun sem þessi. Viðurkenningar voru veittar í tveimur flokkum, Hvatningaverðlaun Ferðaþjónustu bænda og Framúrskarandi ferðaþjónustubær 2011. Það var voru veitt þrenn verðlaun í hverjum flokki. Heydalur í Mjóafirði var eitt þriggja ferðaþjónustufyrtækja inn vébanda Ferðaþjónustu bænda sem hlutu hvatningarverðlaunin.

Í rökstuðningi fyrir viðurkenningunni um Heydal segir:

Þetta eru stórhugar á Vestfjörðum sem eru á góðri leið með að byggja upp hinn sannkallaða ævintýradal í Heydal, þar sem allir ættu að geta fundið eitthvað við sitt hæfi allan ársins hring. Áhersla er lögð á að bjóða upp á fjölbreytta náttúrutengda afþreyingu á staðnum, s.s. gönguferðir, hestaferðir, kajakferðir og selaskoðun. Á markvissan hátt hafa þau einnig verið að vinna að lengingu ferðamannatímabilsins t.d. með því að bjóða upp á norðurljósaferðir á Vestfirðina. Þau leggja mikið upp úr samstarfsverkefnum og má þar t.d. nefna samstarf við Vatnavini varðandi hugmyndir um nýtingu á heita vatninu. Lifandi verkefni hér á ferðinni og verður spennandi að fylgjast með framhaldinu.

Ferðamálasamtök Vestfjarða vilja óska þeim Stellu og Gísla hjartanlega til hamingju með sérlega verðskuldaða viðurkenningu sem öll vestfirsk ferðaþjónusta getur ekki síður verið stolt af.

Heimasíða Ævintýradalsins í Heydal er á slóðinni www.heydalur.is.

Sk�rsla starfsh�ps um endursko�un sto�kerfisins � Vestfj�r�um

Mon, 14 Nov 2011 10:44:00 +0000

Starfshópur um endurskoðun stoðkerfis sem skipaður var fljótlega eftir Fjórðungsþing á haustdögum hefur lagt fram skýrslu með tillögum um breytingu á stoðkerfi Vestfjarða. Hópurinn sem var skipaður fulltrúum frá Atvinnuþróunarfélagi Vestfjarða, Fjórðungssambandi Vestfirðinga, Markaðsstofu Vestfjarða, Menningarráði Vestfjarða og Vaxtarsamningi Vestfjarða hefur skilað frá sér tillögum sem verða lagðar fyrir auka fjórðungsþing þann 25. nóvember næstkomandi. Starfshópurinn klofnaði í afstöðu sinni en fulltrúi Ferðamálasamtaka Vestfjarða í stjórn Markaðsstofunnar styður tillögu sem fram kemur í eftirfarandi áliti stjórnar samtakanna.

Skýrsla starfshópsins er að finna í heild sinni á þessum tengli http://vestfirskferdamal.is/skraarsafn/skra/70/ . Ályktun FMSV er einnig að finna aftast í skýrslu starfshópsins.

Ályktun og tillaga stjórnar Ferðamálasamtaka Vestfjarða vegna umræðu um sameiningu stoðkerfis á Vestfjörðum.

Stjórn Ferðamálasamtaka Vestfjarða telur fram komnar tillögur starfshóps um sameiningu stoðkerfis á Vestfjörðum óásættanlegar. Stjórnin lítur þannig á að verið sé að leggja niður Markaðsstofu Vestfjarða sem starfar fyrst og fremst sem markaðsstofa ferðamála, og þar með slíta tengsl grasrótarinnar við stoðkerfið.

Ferðamálasamtök Vestfjarða hafa mörg undanfarin ár átt góð og árangursrík samskipti við Markaðsstofu Vestfjarða og er einn af stofnaðilum stofunnar og hafa lagt fram fjármuni árlega til reksturs hennar. Á sama hátt hafa Ferðamálasamtökin átt gott samstarf við Atvinnuþróunarfélag Vestfjarða og fleiri stofnanir í stoðgrindinni.

Með þessum tillögum er verið að skerða verulega möguleika Ferðamálasamtakanna til samstarfs við stoðkerfið og minnka áhrif greinarinnar við stefnumótun og ákvarðanatöku. Ferðamálasamtökin vilja gjarnan að Markaðsstofa Vestfjarða vinni í náinni samvinnu við aðrar stoðstofnanir þannig að hinn mikli mannauður innan þeirra nýtist betur til góðra verka.

Mikilvægt er að fagstofnun eins og Markaðsstofu Vestfjarða sé tryggð sjálfstæði og starfsöryggi eins og núverandi samþykktir kveða á um.

Stjórnin sér fram á að með þátttöku í fagráði, eins og fram kemur í áðurnefndum tillögum starfshóps, muni fulltrúi ferðaþjónustunnar fjalla einungis að mjög takmörkuðu leyti um málefni greinarinnar. Að auki hafi fagráð takmörkuðu hlutverki að gegna sem ráðgefandi aðili til stjórnar nýrrar stofnunnar.

Stjórn Ferðamálasamtaka Vestfjarða hvetur sveitarstjórnarfulltrúa að endurskoða fram komnar tillögur. Hvergi er bent á kosti sameiningar fyrir Markaðsstofu Vestfjarða í tillögunum og ekkert sem sýnir fram á að sameining allra stoðstofnana muni efla þau verkefni sem ferðaþjónustan stendur frammi fyrir.

Stjórn Ferðamálasamtaka Vestfjarða leggur fram eftirfarandi tillögu:

Formlegt klasasamstarf verði myndað meðal allra stofnana undir stjórn og að frumkvæði Fjórðungssambands Vestfjarða ásamt aðkomu fulltrúa hins opinbera. Vettvangur þar sem öll helstu verkefni eru kynnt og samstarf stofnananna útfært eftir þörf. Allar stofnanir hafi sama viðmót, reynt verði eftir megni að tryggja þekkingarklasa á hverjum stað með því að starfsstöðvar verði undir sama þaki. Haldnir verði reglulegir samþættingarfundir með þátttöku starfsmanna og stjórna.

Uppskeruh�t�� fer�a�j�nustunnar - Dagskr�, skr�ning, matse�ill, hvatningarver�laun

Sat, 08 Oct 2011 15:06:00 +0000

Um næstu helgi. laugardaginn 15. október ætlar ferðaþjónustan á Vestfjörðum að gera sér glaðan dag og halda uppskeruhátíð. Það eru allir sem starfa í ferðaþjónustu eða hafa áhuga á greininni velkomnir að taka þátt í húllumhæinu. Ferðaþjónustufyrirtæki eru hvött til að bjóða starfsfólki sínu með á hátíðina, því eins og við öll vitum þá er fátt mikilvægara en að fólk sem starfar í greininni þekkir til hvors annars á því víðfeðmna svæði sem Vestfirðir eru. Uppskeruhátíðin mun fara fram í Dýrafirði að þessu sinni og ljúka með mikilli veislu á Hótel Núpi um kvöldið þar sem einnig er gert ráð fyrir að fólk gisti. Skráning fer fram hjá Vesturferðum á netfanginu siggi@vesturferdir.is eða í síma 856 1777.

Í tengslum við uppskeruhátíðina hefur verið ákveðið að veita árlega sérstök hvatningarverðlaun til einstaklings eða fyrirtækis í geininni sem starfar í fjórðungnum og álitið að skarað hafi fram úr á árinu 2011 varðandi nýsköpun, þjónustu eða umhverfisstefnu. Óskað verður eftir tilnefningum frá greininni sjálfri. Í tilnefningunni þarf að koma fram nafn sendanda, hver er tilnefndur og litlum rökstuðningi sem þarf að fylla minnst tvær til þrjár setningar. Tilnefningarnar skal senda á netfang Ferðamálasamtaka Vestfjarða, vestfirdir@gmail.com merkt "Tilnefning".

Dagskráin er eftirfarandi:

Mæting að Núpi kl. 12:00 – 14:00

Ferð með rútu um hinn dýrðlega Dýrafjörð

14:30 Í Haukadal verður leiðsögn um söguslóðir Gísla sögu Súrssonar. Þórir Örn Guðmundsson

15:00 Samkomuhúsinu á Gíslastöðum. Þrjú sýnishorn úr staðbundnum leikritum Kómedíuleikhússin.

16:00 Heimsókn á Þingeyri. Skoðað verður:

Víkingaþorpið

Gistiheimilið Við Fjörðinn

Hótel Sandafell

Vélsmiðjan

Víkingaskipið Vésteinn

Simbakaffi (belgískar vöfflur)

18:00 Ekið að Hótel Núpi

20:00 Kvöldverður (Smellið hér til að sjá matseðilinn)

Tilkynnt um hvatningarverðlaun FMSV 2011

Pub Quis undir handleiðslu Sigga Atla

Fordrykkur og vín með matnum er í boði Vífilfells.

Hljómsveitin X-press undir handleiðslu Benna Sig, spilar fyrir dansi fram á rauðanótt.

Verð fyrir allan pakkan ásamt gistingu og morgunverði er kr. 13.900 pr. mann í tveggja manna herbergi.

Fyrir einn í herbergi er 3.500 kr. aukagjald.

Skráningu skal lokið FYRIR fimmtudaginn 13. október. Skráning fer fram hjá Vesturferðum á netfanginu siggi@vesturferdir.is eða í síma 856 1777.

Gleðilega uppskeruhátíð!

�sland - Allt �ri� - og l�ka � Vestfj�r�um

Fri, 16 Sep 2011 13:18:00 +0000

Ferðamálasamtök Vestfjarða og Vesturferðir hafa ákveðið að leggja sameiginlega 500 þús. kr. til verkefnisins Ísland – Allt árið sem kynnt hefur verið undanfarið allt í kringum landið. Samstarfsaðilar að verkefninu eru Iðnaðarráðuneytið, Samtök verslunar og þjónustu, Samtök ferðaþjónustunnar, Icelandair, Iceland Express, Reykjavíkurborg og Íslandsstofa.

Íslandsstofa sér um framkvæmd verkefnisins „Ísland – Allt árið“. Verkefnið er til þriggja ára og er þegar hafinn undirbúningur vetrarátaks sem hefst á haustmánuðum. Vestfirsk vetrarferðamennska mun njóta góðs af þessu verkefni og verða sérstaklega kynnt í gegnum heimasíðu www.inspiredbyiceland sem hlaut nýverið alþjóðlega viðurkenningu fyrir einstaklega vel heppnað markaðsátak. Í gegnum þá vefsíðu verður tengill inn á vefsíðu Markaðsstofu Vestfjarða westfjords.is/wintertours þar sem fjallað verður sérstaklega um hvað er í boði yfir veturinn á Vestfjarðakjálkanum öllum.

Samhliða er unnið innan verkefnisinsað langtíma verk- og markaðsáætlun fyrir ferðaþjónustuna.
Verkefnið hefur þann tilgang að jafna árstíðarsveiflu í komu ferðamanna og skapa þannig ný störf og auka arðsemi af greininni. Verkefnið mun byggja á þeirri fjárfestingu sem lögð hefur verið í markaðsátakið Inspired by Iceland og vinna áfram með það vörumerki. Það beinist fyrst og fremst að því að auglýsa og kynna Ísland sem áfangastað allt árið, en um leið verður leitast við að virkja almenning á Íslandi til þátttöku í verkefninu.
Einnig verður horft til úrvinnslu og niðurstaðna úr verkefninu „Vetrarferðaþjónusta“ sem verið er að vinna úr eftir sumarið 2011, af hagsmunaaðilum í ferðaþjónustu auk ráðuneytis ferðamála.

Markmið verkefnisins er:
„Að styrkja ímynd Íslands sem áfangastað ferðamanna allt árið um kring“.
„Að fjölga ferðamönnum utan háannar um 100.000 frá september 2011 – september 2014 eða um 12% á ári“
„Að auka verslun erlendra ferðamanna þannig að endurgreiðsla af VSK til ferðamanna utan háannar aukist úr 560 milljónum í 800 milljónir á tímabilinu“

Með 500.000 þúsund króna framlaginu fá aðilar tengil inn á vef verkefnisins www.inspiredbyiceland.com, aðgang að árlegum fundi þátttakenda og þar með kost á að hafa áhrif á áherslur í markaðsmálum. Lógó aðilans ásamt kynningartexta sem nemur 2 línum kemst inn á vef verkefnisins og hlekk á vefsíðu í snjallsíma og spjaldtölvulausnum Inspired by Iceland auk þess sem leyfi fæst til að nota vörumerkið „Inspired by Iceland“ á öllu kynningarefni.

Þetta er þriggja ára verkefni og á næsta ári mun verða leitað eftir nánara samstarfi við öll fyrirtæki í ferðaþjónustu á Vestfjörðum við að kosta framlagið.