Ferðasýning í Perlunni 1.-2.maí

Mynd frá sýningunni Perlan Vestfirðir frá 2006
Mynd frá sýningunni Perlan Vestfirðir frá 2006
Helgina 1.-2.maí nk. er fyrirhuguð ferðasýning í Perlunni. Sýningin er samstarfsverkefni allra markaðsstofa landshlutanna, höfuðborgarstofu og ferðaþjónustu bænda.

Markaðsstofa Vestfjarða verður með bás á sýningunni og býðst öllum ferðaþjónum á Vestfjörðum að taka þátt í sýningunni endurgjaldslaust.


Mikið verður lagt í kynningu á þessari sýningu og er gert ráð fyrir miklum fjölda gesta á sýninguna.

 

Dagskrá sýningarinnar er sem hér segir:
Föstudagur 30. Apríl

16:00 Opnunarhóf sýningarinnar

 

Laugardagur 1.maí
10:00 til 17:00 Opnunartími sýningar

 

Sunnudagur 2.maí
10:00 til 17:00 Opnunartími sýningar

 

Hægt er að sjá yfirlitsmynd af sýningarsvæðinu og staðsetningu á bás Vestfjarða með því að smella hér.

 

Áhugasamir ferðaþjónar geta haft samband við Jón Pál í 4504040/8994311 og jonpall@westfjords.is og skráð sig til þátttöku í sýninguna. Þátttaka er ferðaþjónum að kostnaðarlausu en gert er ráð fyrir að allir ferðaþjónar á sýningunni taki þátt í að kynna ALLA Vestfirði.

 

mbk, Jón Páll

 

Ályktun aðalfundar 2010 vegna samgöngumála

Frá aðalfundi FMSV þann 17. apríl
Frá aðalfundi FMSV þann 17. apríl
Á fjölmennum aðalfundi Ferðamálasamtaka Vestfjarða á Hótel Núpi þann 17. apríl 2010 var eftirfarandi ályktun lögð fram og samþykkt samhljóða.

„Aðalfundur Ferðamálasamtaka Vestfjarða skorar á stjórnvöld að skera ekki niður framlög til samgöngumála í fjórðungnum. Bættar samgöngur eru forsenda uppbyggingar í ferðaþjónustu á Vestfjörðum.“


Frá því aðalfundurinn var haldinn hefur verið tekin ákvörðun um að fella Dýrafjarðargöng úr samgönguáætlun. Ferðamálasamtök Vestfjarða hljóta að mótmæla því harðlega og krefjast þess að íbúar á Vestfjarðakjálkanum sitji við sama borð og aðrir landsmenn þegar kemur að ákvörðunum um vegamál. Með þessari ákvörðun er verið að skerða verulega samkeppnishæfni vestfirskra fyrirtækja til lengri tíma. Vegabætur í fjórðungnum hafa verið langt á eftir öðrum landshlutum í áratugi. Sú ákvörðun Alþingis að fella Dýrafjarðargöng út úr samgönguáætlun lýsir fyrst og fremst fullkomnu skilningsleysi gagnvart íbúum fjórðungsins og setur stefnumótunarvinnu ferðaþjónustunnar í uppnám.

Ávarp umhverfisráðherra á málþinginu Umhverfisvottaðir Vestfirðir

Svandís Svavarsdóttir umhverfisráðherra sat ráðstefnuna frá upphafi til enda og tók virkan þátt í henni.
Svandís Svavarsdóttir umhverfisráðherra sat ráðstefnuna frá upphafi til enda og tók virkan þátt í henni.
1 af 3

Ágætu ráðstefnugestir,

Það er mér sérstök ánægja að vera með ykkur hér í dag á hinu forna höfuðbóli, Núpi, mitt í hinni einstæðu náttúru Vestfjarða, umlukin stórbrotnum fjöllum og með útsýni til hafs út á Dýrafjörðinn.


Meira

Skýrsla formanns á aðalfundi 2010

Frá aðalfundi.
Frá aðalfundi.
1 af 3
Frá síðasta aðalfundi Ferðamálasamtaka Vestfjarða sem haldinn var á Drangsnesi fyrir réttu ári síðan þann 18. apríl 2009, hafa verið haldnir sjö stjórnarfundir. Þrisvar sinnum hefur stjórnin náð að hittast augliti til auglitis og fjórum sinnum hafa fundir verið haldnir í gegnum síma. Stjórnin öll hefur verið starfsöm og tekið virkan þátt í þeim málefnum sem rædd hafa verið á fundunum. Ég vil þakka þeim öllum kærlega fyrir samstarfið á liðnu ári og hlakka til að takast á við frekari verkefni í framtíðinni, með þeim stjórnarmönnum sem halda áfram og þeim sem koma nýjir inn. Ég vil færa sérstakar þakkir til Áslaugar Alfreðsdóttur sem hefur ákveðið að bjóða sig ekki fram til endurkjörs að þessu sinni. Áslaug hefur unnið mikið og óeigingjarnt starf í þágu ferðaþjónustu á Vestfjörðum innan Ferðamálasamtaka Vestfjarða frá árinu 1988.

Á liðnu starfsári var vinna við stefnumótun ferðaþjónustunnar áberandi sem var eitt þeirra helstu markmiða liðins starfsárs. Ferðamálasamtökin fengu í lið með sér Ásgerði Þorleifsdóttur frá AtVest, Jón Pál Hreinsson frá Markaðsstofu Vestfjarða og Jón Jónsson frá Menningarráði Vestfjarða til að hjálpa til við að stýra vinnunni undir forystu Ásgerðar, en óhætt er að segja að meginvinna verkefnisins hafði verið á hennar herðum. Haldnir voru fjölmennir fundir á haustdögum um allan fjórðunginn þar sem rædd voru málefni ferðaþjónustunnar út frá öllum hliðum og sóttar upplýsingar til þeirra sem sóttu fundina um hvaða verkefni þyrfti að vinna að á næstu árum. Stefnumótunarskýrslan var kynnt á fundi í gærkvöldi hér í þessum sal á Hótel Núpi í Dýrafirði og verður gefin út von bráðar.

Það koma skýrt fram meðal ferðaþjónustunnar á stefnumótunarfundunum að stefnt skuli að því að Vestfirðir verði leiðandi svæði í umhverfismálum og sjálfbærri ferðaþjónustu og skapi sér ímynd og sérstöðu á því sviði. Ferðaþjónustan á Vestfjörðum skuli einkennast af gæðum, trausti og gestrisni heimamanna og á að styðja undir sérstöðu svæðisins sem byggi á ósnortinni náttúru, friðsæld og öðruvísi upplifun á umhverfi og menningu svæðisins.

Eftir þessa fjölmennu fundi þar sem nokkuð á annað hundrað manns víðsvegar á Vestfjarðakjálkanum lögðu fram hugmyndir og umræðu til stefnumótunarinnar kom það berlega í ljós að Vestfirðingar eru tilbúnir til að hefja umræðu af fullri alvöru um alla þætti umhverfismála. Raunar kom fram skýr krafa um það á fundunum að sá málaflokkur yrði tekinn sérstaklega fyrir við allt skipulag ferðaþjónustu á Vestfjörðum. Stjórn Ferðamálasamtaka Vestfjarða sá að ekki væri eftir neinu að bíða að koma umræðunni af stað og ákvað þegar í stað að stefna að metnaðarfullri ráðstefnu, Umhverfisvottaðir Vestfirðir, í tengslum við næsta aðalfund samtakanna. Sú ráðstefna mun hefjast eftir þennan aðalfund okkar þar sem fram fjöldi fræðimanna og sérfræðinga sem hafa látið umhverfismál til sín taka og munu miðla ráðstefnugestum af mikilli reynslu sinni á því sviði.
Ferðamálasamtök Vestfjarða stefna að því að fylgja ráðstefnunni eftir í samvinnu við Fjórðungssamband Vestfirðinga. Markmiðið er að umhverfisvottun Vestfjarða komist á dagskrá Fjórðungssambandsins og að vestfirsk sveitarfélög sameinist um að stefna að slíkri vottun, í það minnsta taki upp þá umræðu á meðal íbúanna.

Ferðamálasamtökin hafa haft hlutdeild að Markaðsstofunni ásamt Fjórðungssambandi Vestirðinga og Atvinnuþróunarfélagi Vestfjarða frá stofnun hennar árið 2006. Megnið af þeim tíma eða frá því um mitt ár 2006 hefur Jón Páll Hreinsson verið forstöðumaður hennar og unnið vasklega að markaðsverkefnum innan hennar og verið sérlega duglegur að setja sig inn í málefni ferðaþjónustunnar og vinna greininni framgang. Hann sagði nýlega upp störfum og stefnir að því að snúa sér að öðrum verkefnum í framtíðinni. Núna á vordögum mun stjórn Markaðsstofunnar auglýsa eftir nýjum forstöðumanni og stefnir að því að ráða til starfa nýjan forstöðumann í byrjun ágúst n.k.. Það bíður stjórnar Markaðsstofunnar krefjandi verkefni að ráða í þetta mikilvæga starf í stoðkerfi greinarinnar og það verður vandaverk að fylla starf Jóns Páls. Ég vil fyrir hönd Ferðamálasamtaka Vestfjarða senda Jóni Páli kærar þakkir fyrir ánægjulegt og farsælt samstarf undanfarin ár og óska honum alls hins besta í framtíðinni við ný verkefni.

Göngukortin sjö sem samtökin hafa unnið að útgáfu á undanfarin ár voru öll komin í sölu á síðasta ári. Salan á þeim gekk vel og söluveltan á þeim var vel aðra milljón króna. Stjórnin tók umræðu í vetur um framhald á útgáfu kortanna þar sem farið vary fir lagerstöðu og skoðað hvenær þörf væri á nýrri prentun á einstökum kortum. Miðað við lagerstöðu þykir ekki ástæða til að ráðast í prentun fyrir sumarvertíðina í ár heldur að taka ákvörðun um það fyrir næsta ár. Hliðarverkefni tengd göngukortunum komu líka til umræðu innan stjórnarinnar s.s. gönguleiðamerkingar í tengslum við merktar leiðar á kortunum. Göngukortin þurfa að vera sjálfbær, það er, að sala þeirra standi undir endurútgáfu þeirra þegar á þarf að halda og gerð merkinga. Í því ljósi ákvað stjórnin á fundi þann 16. janúar að útsöluverð kortanna frá Ferðamálasamtökunum yrði kr. 600.

Ferðaþjónusta er atvinnugrein sem hefur mikil og jákvæð áhrif inn í samfélagið en það eru oft óljós mörk á því hvar landamæri hennar liggja. Ef ekki væri fyrir öfluga ferðaþjónustu þá byggju íbúarnir ekki endilega við sömu lífskjör og annars væri. Rekstur sundlauga, matvöruverslana, veitingastaða og hverskyns afþreyingar auk margvíslegrar annarrar þjónustu, sem þykir sjálfsögð í öllum byggðum, væri vart svipur hjá sjón ef ekki hefði verið unnið markvisst við uppbyggingu ferðaþjónustu mörg undanfarin ár. Þegar upp er staðið þá starfa fleiri að einhverju leyti við ferðaþjónustu en fólk gerir sér kannski almennt grein fyrir.
 
Það er ekki síst þess vegna sem ferðaþjónustan, sem er mikilvæg atvinnugrein, þarf að vera óhrædd við að líta í eigin barm og íhuga hvað betur megi gera. Sjálfsgagnrýni er okkur öllum hollt og við þurfum öll að gera okkur grein fyrir því að við berum mikla ábyrgð gagnvart þeim samfélögum sem við búum í. Jafnt vegna þess sem ég nefndi hér á undan og ekki síður vegna þeirrar ímyndar sem greinin hefur út á við. Við sjálf þurfum stöðugt að reyna að gera betur og stefna í sameiningu að því að ferðaþjónustan eflist og glæðist. Jafn vetur, vor, sumar og haust. Það er að öllu leyti undir okkur sjálfum komið.
 
Ég vil þakka fyrir margar góðar samverustundir með ferðaþjónustuaðilum á Vestfjörðum frá því ég tók við formennsku Ferðamálasamtakanna á síðasta ári og hlakka til að taka þátt í mörgum spennandi verkefnum sem framundan er. Að vinna að gæðaboðorðum Ferðamálasamtakanna, stuðla að lengri opnunartíma fyrirtækja með einhverjum ráðum, fræðslumálum, koma á samvinnu ólíkra aðila, efla ferðaþjónustuna almennt og vinna að öllum þeim þjóðþrifaverkefnum sem þið lögðuð til í stefnumótunarvinnunni á síðasta starfsári.
 
Hótel Núpi í Dýrafirði þann 17. apríl 2010
Sigurður Atlason
formaður FMSV

Stefnt að umhverfisvottuðum Vestfjörðum

Forsíða ráðstefnuritsins.
Forsíða ráðstefnuritsins.
„Ég hef á tilfinningunni að ráðstefnan hafi þegar gert það gagn að nú verði ekki aftur snúið í þessum málum og ég er mjög bjartsýnn á að Vestfirðingar séu tilbúnir að ræða þessi mál af alvöru og hrinda þeim í framkvæmd,“ segir Sigurður Atlason, formaður Ferðamálasamtaka Vestfjarða um ráðstefnuna Umhverfisvottaðir Vestfirðir sem haldin var á Núpi í Dýrafirði um helgina. Á ráðstefnunni voru haldin fjölbreytt erindi. Rætt var um stöðu umhverfismála á Íslandi og hvaða aðgerða sé hægt að grípa til, auk þess sem þessi mál voru sett í hnattrænt samhengi. Fjallað var um almennt viðhorf til náttúrunnar og sagðar reynslusögur af vottun einstakra fyrirtækja, með áherslu á mikilvægi vottunar fyrir markaðsstarf og daglegan rekstur. Loks var sagt frá sérstökum verkefnum, svo sem hugmyndum um rafbílavæðingu Íslands. „Ekki er nokkur vafi á að rafbílavæðing hefur víðtæk áhrif í samfélaginu. Nýting innlendra orkugjafa, bætt nýting núverandi raforkukerfis, gjaldeyrissparnaður, áhrif í ferðamannaiðnaði og fjölmörg önnur atriði hafa jákvæð fjárhagsleg áhrif á samfélagið. Minni mengun hefur að auki umhverfislegan ávinning fyrir land og þjóð,“ sagði í erindinu á ráðstefnunni.

Þá var tæpt á mikilvægi þess að Ísland í heild verði umhverfisvottað. „Heimurinn allur, ekki einungis Ísland, stendur nú á tímamótum og er nauðsynlegt að taka marga grunnþætti lífernis okkar til endurskoðunar til að draga úr neikvæðum áhrifum okkar á jörðina. Íslenskt samfélag hefur að auki orðið fyrir áfalli. Mikilvægt er að uppbygging og framtíð landsins byggi á sjálfbærni og sterku siðferði. Umhverfisvottun Íslands er ein leið til aukinnar sjálfbærni í lifnaðarháttum okkar og hefði jafnframt í för með sér margvísleg jákvæð áhrif á atvinnu- og mannlíf,“ sagði í erindi frá Náttúrustofu Vesturlands.

Ferðamálasamtök Vestfjarða stefna að því að fylgja ráðstefnunni eftir í samvinnu við Fjórðungssamband Vestfirðinga. Markmiðið er að umhverfisvottun Vestfjarða komist á dagskrá Fjórðungssambandsins og að vestfirsk sveitarfélög sameinist um að stefna að slíkri vottun.

Áhugasömum er bent á að hægt er að sjá ráðstefnuritið á vef Ferðamálasamtaka Vestfjarða og kynna sér hvað kom fram á ráðstefnunni í stuttu máli.

thelma@bb.is
http://bb.is/Pages/26?NewsID=147286